ولایت پورٹل:جمہوریہ عراق کے مفتی اعظم کے مشیر سرمد التمیمی نے قرآن پاک کی بے حرمتی کے حوالے سے بعض اسلامی حکومتوں کی خاموشی کو اسلام کے دشمنوں کا ساتھ دینے سے تعبیر کرتے ہوئے مسلمانوں سے اسلام کے دفاع کے لیے اسلام کے جھنڈے تلے متحد ہونے کی اپیل کی۔
 انہوں نے قرآن پاک کو نذر آتش کرنے کے حوالے سے کہا کہ بطور مسلمان ہمیں جان لینا چاہیے کہ اسلام کے دشمن اسلام اور مسلمانوں کو نقصان پہنچانے کا کوئی موقع ہاتھ سے جانے نہیں دیتے، لیکن ہماری کچھ مسلمان حکومتیں ایسے لوگوں کی تعریف کرتی ہیں جو اسلام کو نقصان پہنچانا چاہتے ہیں،حالانکہ خدا کے حکم سے وہ اسے نقصان نہیں پہنچا سکتے لیکن اس طرح کے اقدامات کے خلاف خاموشی ان حکومتوں کی اسلام دشمنوں کے ساتھ ملی بھگت کو ظاہر کرتی ہے اس لیے ہم مسلمانوں کو جان لینا چاہیے کہ اللہ تعالیٰ ہم سے اپنے دین کے سلسلہ میں سستی سے کام لینے کا حساب لے گا۔
 جمہوریہ عراق کے مفتی اعظم کے مشیر نے مزید کہا کہ ہماری قوم کے علما کو چاہیے کہ وہ ہاتھ جوڑ کر ان مکروہ رویوں کے خلاف موقف اختیار کریں کیونکہ انہیں اللہ تعالیٰ کے سامنے اس سلسلہ میں جوابدہ ہونا پڑے گا،کیونکہ وہ جانتے ہیں کہ اللہ تعالیٰ اپنے دین کی حفاظت کرتا ہے۔
 انہوں نے واضح کیا کہ اللہ تعالیٰ کے بعد تمام مسلمانوں بالخصوص اسلامی علماء پر اپنے دین کا دفاع فرض ہے۔ خاص طور پر جب ہم دیکھتے ہیں کہ اسلام کے دشمن اسلام کے بارے میں ایسے بات کرتے ہیں گویا یہ دہشت گردی کا مذہب ہے،ان کا دوہرا معیار ہے اور وہ اپنے منصوبے کو آگے بڑھانا چاہتے ہیں۔
یاد رہے کہ گزشتہ بدھ کو مصر کی الازہر یونیورسٹی نے بھی عرب دنیا کے شہریوں اور مسلمانوں سے کہا کہ وہ تمام ڈچ مصنوعات اور سویڈش اشیاء کا بائیکاٹ کریں اور قرآن پاک کی حمایت میں مضبوط اور متحد موقف اختیار کریں۔