متفرق سوالات

اسماء جلالہ

 طہارت و نجاست

تقلید- ولایت فقیہ

متفرق سوالات

 فوٹو اور فلم دیکھنا۔

س ۱: کیامرد لذت کے قصد و ارادے سے اپنی ہمسر کے فوٹو اور فلم دیکھ سکتا ہے ؟
س ۲: اگر ہمسر انتقال کرگئی ہو تو اس کےبارے میں کیا حکم ہے ؟
ج : ہمسر کے فوٹو اور فلم دیکھنا مطلقا جائز ہے ۔

ایسی دوا سے علاج کرناجو جلد مرنے کا سبب بنے ۔

س : اگر کوئی شخص وقتی طور پر جلدی شفاحاصل کرنے یا درد دور کرنے کے لئے ایسی دوا کا استعمال کرے جو جلد مرنے کا سبب بن جائے تو اس کے استعمال کے بارے میں کیا حکم ہے ؟
ج : اگر جلد مرنے کا سبب بنے تو علاج نہیں ہے بہر صورت اگر عقلائی اعتبار سے اس میں قابل توجہ ضرر نہ ہو تو علاج کے لئے فی نفسہ کوئی اشکال نہیں ہے ۔

نماز کے الفاظ میں تبدیلی۔

س : اگر ہم نماز کے سلام میں کلمہ " ایھا النبی " کی جگہ " یا ایھا النبی " کہیں تو کیا اس میں اشکال ہے یا نہیں ؟
ج : اگر سہوا ہو تو کوئی اشکال نہیں ہے لیکن عمدا نماز میں کسی چیز کا اضافہ کرنا درست نہیں ہے ۔

مدارس میں بچوں کو حرام غذا پیش کرنےکے سلسلے میں والدین کی ذمہ داری ۔

س ۱ : میں جاپان میں رہتا ہوں میری چھ سالہ بچی ہے جو جاپانی مدرسے میں پڑھتی ہےجاپانی مدارس میں بچوں کو غذا دی جاتی ہے جس میں سور کا گوشت بھی ہوتا ہے چونکہ اپنے بچے کی غذا کو دوسرے بچوں کی غذا سے الگ کرنا مشکل کام بھی ہے اور بچے کے نفسیات پر اس کےمنفی اثرات بھی مرتب ہوتے ہیں اور ابھی بچی نابالغ بھی ہے میرا سوال یہ ہے کہ اس صورت میں ذمہ داری کیا ہے ؟ کیا حتما اس کی غذا کو ہم الگ کردیں اگر چہ ایسا کرنا مشکل بھی ہو ؟ یا یہ کہ اس میں کوئی اشکال نہیں ہےوہ اپنی کلا س کے ساتھیوں کے ساتھ کھانا کھا سکتی ہے اگر چہ غذا میں سور کا گوشت ہی کیوں نہ ہو ؟
س ۲ : احکام کی بعض کتابوں میں میں نے دیکھا ہے کہ بچوں کو نجس شئی کھلانے میں کوئی اشکال نہیں ہے اگر وہ مضر نہ ہو تو کیا میرا پہلا سوال بھی اسی قسم سے ہے ؟
ج : بچوں کو نجس شئی اور سور کا گوشت کھلانا حرام ہے اگر تم خود ایسا کام نہیں کرتے ہو تو منع کرنا بھی تمہاری ذمہ داری نہیں ہے ۔

نماز کے سلام میں اشتباہ کی بنا پر سجدہ سہو ۔

س : ۹ سال کی عمر سے ۲۳ سال تک میری یہ عادت تھی کہ نماز کے سلام میں " السلام علیکم و رحمۃ اللہ وبرکاتہ " سے قبل کے صحیح سلاموں کی جگہ یہ کہا کرتی تھی السلام علیک یا ابا عبداللہ ، ۲۳ سال کی عمر میں ایک شخص نے مجھے سلام کا صحیح طریقہ بتایا وہ نمازیں جو میں پڑھ چکی ہوں ان کے بارے میں کیا حکم ہے؟ معظم لہ کے مقامی نمائندے سے میں نے دریافت کیا تو انھوں نے کہا کہ نمازیں صحیح ہیں کیونکہ السلام علیکم و رحمۃ اللہ وبرکاتہ پر نماز تمام کرنا کافی ہے لیکن نماز میں جو مطلب اضافی ادا کیا گیا ہے اس کے عوض ہر نماز کے لئے ایک سجدہ سہو بجالاناچاہیے لہذا میں آپ سے براہ راست پوچھنا چاہتی ہوں کہ آپ کی نظر میں کیا ایسا ہی ہے اور کیا سجدہ سہو ۱۴ سال کی نمازوں کے لئے زیادہ نہیں ہے اس کے علاوہ ہرروز میں کتنے سجدہ سہو بجا لاؤں ان سجدوں کی وجہ سے میرے گھٹنوں میں درد ہوگیا ہے اب میں کیا کروں ؟
ج : مذکورہ صورت میں سجدہ سہو واجب نہیں ہے اگر چہ احوط ہے ۔

 گھریلو امور انجام دینے میں عورتوں کی ذمہ داری ۔

س : ہم دوبئی میں رہتے ہیں یہاں مردوں نے تمام گھریلو ذمہ داریاں عورتوں پر ڈال دی ہیں اور گھر میں عورتوں کے لئے سرگرمی کا کوئی ذریعہ نہیں ہے مرد خواتین کے لئے تفریح کے مواقع بھی فراہم نہيں کرتے ہیں اس کے بارے میں کیا حکم ہے ؟
ج : عورتوں کو گھریلو امور انجام دینے پر مجبور کرنا مردوں کے لئے جائز نہیں ہے شوہر دار عورتیں اپنے ذاتی امور میں آزاد ہیں اور شوہر داری کے علاوہ ان پر کوئی مزید ذمہ داری نہیں ہے ۔

پردے کی پابندی ۔

س : اگر بیوی پردے کی پابندی نہ کرتی ہو تو کیا شوہر اس کو لڑائی جھگڑے یا مار پیٹ کے ذریعہ پردہ کرواسکتا ہے ؟
ج : واجب پردہ کرانےاور تمام شرعی تکالیف کی رعایت کروانے میں شوہر کو لڑائی جھگڑے اور مارپیٹ کا حق حاصل نہیں ہے شوہر صرف نرمی کے ساتھ زبانی طور پر امر بالمعروف اور نہی عن المنکر کرسکتا ہے ۔

نماز جمعہ میں خطبہ ایک شخص اور نماز دوسرا شخص پڑھائے۔

س : کیا نماز جمعہ میں خطبہ ایک شخص اور نماز جمعہ دوسرا شخص پڑھا سکتا ہے؟
ج : صحیح اور مجزی نہیں ہے بلکہ خطبہ اور نماز جمعہ پڑھانے والا ایک ہی شخص ہونا چاہیے۔

کھڑے ہوکر پانی پینا ۔

س : کھڑے ہوکر پانی پینے کے بارے میں شرعی حکم کیا ہے ؟
ج : رات میں کھڑے ہوکر پانی پینا مکروہ ہے ۔

 اہل کتاب کے ساتھ دائمی شادی ۔

س : کیا اہل کتاب کے ساتھ دائمی شادی جائز ہے ؟
ج : جائز نہیں ہے ۔

منافع پر قرضہ لینا ۔

س : بینک میں جاری اکاؤنٹ کے مالک کے اپنے حساب میں کافی مقدار میں مبلغ موجود ہے اور وہ اپنے حساب سے مبلغ نکال سکتا ہے البتہ اگر اکاؤنٹ میں کوئی مبلغ یا اعتبار نہ بھی ہو تو بھی اکاؤنٹ کے مالک کو بینک مشخص مقدار میں مبلغ نکالنے کی اجازت دیتاہےاور یہ معاملہ اطمینان کے ساتھ مشتری کے ساتھ انجام پاتا ہے (مشتری کی توجہ مبذول کرنے کے لئے ) اور پھر بینک حساب سے نکالے گئے مبلغ پر مدت کے اعتبار سے منافع لگاتا ہے اس معاملے کو اضافی رقم نکالنا کہیں گے کیا اس صورت میں حساب سے زیادہ مقدار میں مبلغ نکالنا جائز ہے ؟ کس حالت میں جائز ہے ؟
ج : اگر بینک سے اصل مبلغ کا نکالنا قرض کے طور پر اور منافع ادا کرنے کے ہمراہ ہو تووہ سود اور حرام ہے لیکن اصل مبلغ حلال ہے اور اس مبلغ میں تصرف کرنے میں بھی کوئی اشکال نہیں ہے لیکن حرام سے بچنے کے لئے سود ادا کرنےکی نیت نہ کرے اگر چہ اسے معلوم ہے کہ وہ اس سے سود ضرور وصول کریں گے ۔

شوہر کے مسلمان ہونے کے بعد بیوی اور شوہر کا رابطہ ۔

س : میں نے 5 سال پہلے دین اسلام قبول کیا تھا لیکن میری بیوی اور بچے عیسائی فرقے (مورمن ) پر باقی ہیں اور میں بھی اسلام قبول کرنے سے پہلے اسی فرقے پر اعتقاد رکھتا تھا اسلامی عبادات و مطالعہ میں زیادہ توجہ کے باعث اہل خانہ کے ساتھ میری کشیدگی میں اضافہ ہوجاتا ہے البتہ میں خانوادگی روابط پربھی کافی توجہ دیتا ہوں لیکن اس کے باوجود کامیابی بہت کم ہوتی ہے اب میں کیا کروں ؟ کیا طلاق دینا گناہ ہوگا ؟ کیا طلاق نہ دینا گناہ ہوگا ؟
ج : اگر آپ اور آپ کی بیوی اس سے قبل عیسائی مذہب پر تھے اور حضرت عیسی (ع) کے دین کے آئین کے مطابق آپ نے شادی کی تو آپ کے اسلام قبول کرنے اور آپکی بیوی کے عیسائیت پر باقی رہنے کے بعد آپ کا ازدواجی رشتہ اپنی جگہ پر باقی ہے اور ایک دوسرے سے الگ ہونے کی کوئی ضرورت نہیں ہے بہر صورت طلاق کا اختیار شوہر کے ہاتھ میں ہے ۔

غیر مسلم ممالک کے انتخابات میں شرکت ۔

س ۱: کیا کافر ملک کے قومی انتخابات میں ووٹ ڈالنا جائز ہے ؟
س ۲: اگر جائز ہے تو کیا ایسے نمائندے کو ووٹ دیا جاسکتا ہے کہ جسکی بعض موضوعات( عراق سے انخلاء ۔۔۔) میں مسلمان حمایت کرتے ہیں نہ کسی دوسرے شخص کو ؟
ج ۱، ۲ : قومی انتخابات میں شرکت کرنے اور ووٹ دینےمیں کوئی حرج نہیں ہے اور اس سلسلے میں مسلم اور غیر مسلم نمائندوں میں کوئی فرق نہیں ہے ۔

غیر مسلم کاذبیحہ ۔

س : میں نے سنا ہے کہ یہودی کے ہاتھ سے ذبح ہونے والے جانور کا گوشت کھانا جائز ہے کیا یہ صحیح ہے ؟
ج : غیر مسلم کا ذبیحہ حلال نہیں ہے اگرچہ اس نے تذکیہ کے تمام شرائط کا لحاظ کیوں نہ کیا ہو ۔

آئینے کے سامنے نماز پڑھنا

س : کیا آئینے کے سامنے نماز پڑھنا مکروہ ہے ؟
ج : اگر آئینہ اس طرح نصب ہو کہ نماز کی حالت میں اس میں تصویر دکھائی دیتی ہو اور ذہن مشغول ہوتا ہوتو آئینے کو سامنے سے ہٹا دینا چاہیے یا اس پر کپڑا ڈال دینا چاہیے ۔

فوٹو کے سامنے نماز پڑھنا

س : ایسی جگہ نماز پڑھنے کا کیا حکم ہے جہاں فوٹو نصب ہوں اگر چہ وہ انسان کے سامنے نہ ہوں ؟
ج : فوٹو کسی کا بھی ہو اگر سامنے نہ ہو تو نماز پڑھنا مکروہ نہیں ہے

کھڑے ہو کر پانی پینا

س : کھڑے ہو کر پانی پینے کے بارے میں شریعت کا کیا حکم ہے ؟
ج : رات میں کھڑے ہو کر پانی پینا مکروہ ہے ۔

حق الناس کا مفہوم

س: حق الناس کیا ہے؟ اگر صاحبان حق الناس موجود نہ ہوں تو کیا کرنا چاہیے؟
ج : حق الناس کسی دوسرے شخص کاوہ مال ہے جو قرض لینےیا ضائع کرنے یا کسی جرم کی بنا پر دیہ کے طور پر انسان کی گردن پر عائد ہوتا ہے اگر صاحبان حق تک وہ مال ( مستقبل میں یا کسی اور ذریعہ سے) پہنچانا مشکل ہو تو احتیاط واجب کی بنا پر حاکم شرع سے اجازت لیکر ان کے حق کی مقدار میں صدقہ دینا چاہیے

والدین کی مخالفت

س : کون سے امور میں ماں باپ کی روش کے ساتھ مخالفت حرام ہے ؟
ج : اگر والدین سے متعلق امور میں ان کی روش کے ساتھ مخالفت مراد ہے تو ان کے امور میں مداخلت کا حق نہیں ہے لیکن اگر والدین کی روش کی مخالفت آپ کے امور سے متعلق ہے تو صرف مخالفت حرام نہیں ہے لیکن والدین کو اذیت پہنچانا حرام ہے۔

غیبت اوراس کے حدود

س: مندرجہ ذيل مسائل کے پیش نظر غیبت کی وضاحت کیجئے ؟
1: اگر گفتگو دو افراد کے درمیان کسی تیسرے شخص کے بارے میں کسی معلوم مسئلے کے سلسلے میں ہو۔
2: اگر گفتگو کسی شخص کی اچھائیوں کے بارے میں ہو ۔
3: اگر والدین اپنے فرزندکی تربیت کے سلسلے میں کسی آشنا شخص کی رفتارکے بارے میں بحث وگفتگو کریں۔
ج : کلی طور پر مؤمن کی عدم موجودگی میں اگرایسی گفتگوکی جائے جو حقیقت پر مبنی ہو لیکن اگر وہ اس پر آگاہ اور باخبر ہوجائے تو ناراحت ہوگا یا گفتگو اس کے عیب تلاش کرنے کے سلسلے میں ہو یا عرف عام میں اسے عیب جوئی میں شمار کیا جاتا ہوتواس قسم کی گفتگو غیبت میں شمار ہوتی ہے جو جائز نہیں ہے اور طرفین کےلئے مسئلہ پرآگاہ ہونا یا بچوں کی تربیت وغیرہ کے لئےغیبت کاجواز پیدا نہیں ہوتا البتہ کسی شخص کی اچھائیوں کے بارے میں گفتگو کرنا غیبت میں شمار نہیں ہوتا اور اسی طرح مشورے کے لئے کسی بات سے آگاہ کرنے میں بھی کوئی حرج نہیں ہے ۔

احتیاط واجب

س: جن مسائل میں آپ احتیاط واجب کی بنا پر حکم صادر فرماتے ہیں ان میں مکلف کی تکلیف کیا ہے ؟ کیا آپ کا مقلد اس مسئلہ میں ایسے مجتہد کی طرف رجوع کرسکتا ہے جس نے اس مسئلہ میں واضح فتوی دیا ہو نیز جواز کی صورت میں کیا مکلف کے مرجع کے بعد والے مرجع کا اعلم ہونا ضروری ہے اگر ایسا ہے تو اس کا تعیّن کیسے ہوگا ؟
ج: ایسے مجتہد کی طرف رجوع کرنے میں کوئی اشکال نہیں ہے جس نے اس مسئلہ میں احتیاط نہیں کی ہے لیکن احتیاط کی بنا پر الاعلم فالاعلم کی ترتیب کا لحاظ رکھنا ضروری ہے اور اس کا تعیّن کرنا خود مکلف کی ذمہ داری ہے۔

خاص مسائل میں دوسرے مراجع کی طرف رجوع کرنے کے شرائط

س: اگر مقلد مرجع تقلید سے سوال کرے لیکن وہ بعض دلائل کی بنا پر جواب نہ دے سکے اور دیگر مراجع نے بھی مختلف جوابات دیئے ہوں تو کیا وہ اپنی عقل کی طرف رجوع کرکے اقدام کرسکتا ہے ؟
ج: مذکورہ صورت میں عقل کی طرف رجوع کرنے کا مقام نہیں ہے بلکہ احتیاط کرنا چاہیے اور اگر احتیاط ممکن نہ ہو تو مراجع میں بعد والے اعلم مرجع کے فتوی کی طرف رجوع کرنا چاہیے ۔

اعلم کو پہچاننے کے طریقے

س: دو بالغ اور عادل افراد نے میرے لئے ایسے شخص کے حوالے سے نقل کیا ہے جس کے بارے میں مجھے اطمینان ہے کہ اس نے بھی اس سلسلے میں تحقیق کی ہے کہ فلاں اعلم ہے اور تم اس کی تقلید کرسکتے ہو تو کیا اس طرح تقلید کرنا صحیح ہے ؟
ج: اگر وہ افراد عادل اور اس سلسلے میں ماہر ہوں تو کوئی اشکال نہیں ہے ۔

تقلید- ولایت فقیہ

 دوسرے مرجع کی طرف عدول

س ۔ اگر میں اپنے مرجع کو بدلنا چاہوں تو مجھے کون سے مراحل طے کرنا چاہییں ؟
ج ۔ احتیاط واجب کی بنا پرزندہ مجتہد کی تقلید سے دوسرے کی طرف عدول جائز نہیں ہےمگر یہ کہ دوسرے مجتہد کی اعلمیت کا یقین یا احتمال پیدا ہوجائے تو اس صورت میں بنا بر احتیاط عدول واجب ہے ۔

رہبر معظم کے مقلدین کی تکلیف

س ۔ میں سن بلوغ تک پہنچ گیا ہوں اور رہبر معظم کی تقلید کرنا چاہتا ہوں میں اس سلسلے میں کیا کروں ؟
ج ۔ کتاب استفتاآت کے جوابات ( جو سوال و جواب کی شکل میں عبادات اور معاملات کے احکام پر مشتمل ہے )مناسک حج اور راہنمای فتاوی ( جس میں بعض ایسے موارد کی نشاندہی کی گئی ہے جن میں رہبر معظم کے فتوی اور امام خمینی(رہ) کے فتوی میں فرق ہے ) زیور طبع سے آراستہ ہوچکی ہیں اور سب کے پاس موجود ہیں اور جن مسائل میں آپ کو امام خمینی (رہ) اور رہبر معظم کے فتوی کے اختلاف کا علم نہیں ہے ان میں آپ امام خمینی (رہ) کی توضیح المسائل کی طرف مراجعہ کرسکتے ہیں یا پھر تحریری ، زبانی یا انٹر نیٹ کے ذریعہ فتوی معلوم کرسکتے ہیں

ولایت فقیہ

س ۔ کیا ولی فقیہ اس مجتہد کو کہا جاتا ہے جس کی مکلف تقلید کرتا ہے یا حاکم مجتہد کو کہا جاتا ہے ؟ کلی طور پر ولایت فقیہ سے مراد کیا ہے ؟
ج ۔ جامع شرائط ولی فقیہ سے مراد یہ ہے کہ دین مبین اسلام جو آخری آسمانی دین ہے اور جس کا سلسلہ قیامت تک جاری رہے گا یہ دین حکومت اورمعاشرے کے نظام کو چلانے کا دین ہے لہذا اسلامی معاشرے کے تمام طبقات کے لئے رہبر ، ولی امر اور حاکم کا ہونا ضروری ہے تاکہ وہ اسلام اور مسلمانوں کو دشمنوں کے شر سے محفوظ رکھ سکے اور سماج اور معاشرے میں عدالت برقرار کرسکے طاقتورافراد کی طرف سے کمزور افراد پر ظلم و تعدی کی روک تھام کرسکے اور معاشرے و سماج کے لئے سیاسی ، ثقافتی اور اقتصادی ترقی کے وسائل فراہم کرسکے

س 2 ۔ اگر ولی فقیہ کسی مسئلہ میں حکم دے تو کیا دوسرے مراجع کے مقلدین اپنے مراجع کے فتوی کا حوالہ دیکر ولی فقیہ کے حکم پر عمل نہ کرنے کے مجاز ہیں
ج ۔ شیعہ مذہب کے اصولوں کے مطابق تمام مسلمانوں کے لئے ضروری ہے کہ وہ ولی فقیہ کے ولائی امر ونہی کی اطاعت کریں اور ولی فقیہ کے حکم کا اتباع مقلدین کے علاوہ فقہاء عظام کو بھی شامل ہوتاہے

سن بلوغ

س ۔ لڑکے اور لڑکیوں کے بالغ ہونے کا سن کونسا ہے ؟
ج ۔ لڑکیاں 9 سال قمری کے مکمل ہوجانے پر بالغ ہوجاتی ہیں اور لڑکے 15 سال قمری کے مکمل ہوجانے پر بالغ ہوجاتے ہیں لیکن اگر کوئی اس سن تک پہنچنے سے قبل مجنب ہوجائے یا اس کے زیر ناف (سخت) بال نکل آئیں تو وہ بالغ اور مکلف شمار ہوگا (اگر چہ وہ مذکورہ سن بلوغ تک نہ بھی پہنچا ہو)

ابتدائی تقلید

س ۔ کیا جو شخص سن تکلیف تک پہنچ گیا ہے وہ مردہ مجتہد کی تقلید کرسکتا ہے ؟
ج ۔ احتیاط واجب کی بنا پر ابتدائی طور پر مردہ مجتہد کی تقلید جائز نہیں ہے

احتیاط واجب اور دوسرے مجتہد کی طرف رجوع

س ۔ کیا احتیاط واجب کے موارد میں دوسرے مجتہد کی طرف رجوع کیا جاسکتا ہے ؟
ج ۔ احتیاط واجب کے معنی یہ ہیں کہ مقلداسی احتیاط پر عمل کرسکتا ہے یا ایسے مجتہد کی طرف رجوع کرسکتا ہےجو دوسروں سے اعلم ہو

 طہارت و نجاست

ہاتھ اور پاؤں سے جدا ہونے والی پوست

س ۔ کیا بدن یا ہونٹ سے جدا ہونے والی پوست نجس ہے ؟
ج ۔ وہ نازک اور معمولی پوست جو ہونٹوں ، ہاتھوں ،پاؤں یا بدن کے دوسرے حصوں سے الگ ہوجاتی ہے وہ پاک ہے

مشکوک رطوبت

س ۔ انسان سے (عمدا یا سہوا) تحریک ہونے کے بعد جو رطوبت نکلتی ہے کیا وہ پاک ہے یا نہیں ؟ اور یہ رطوبت منی کا حکم رکھتی ہے یا نہیں ؟
ج ۔ اگر مذکورہ رطوبت کے منی ہونے کے بارے میں شک ہو تو جاننا چاہیے کہ مردوں میں منی کا نکلنا اگر تین علامتوں( شہوت کا احساس ، اچھل کرنکلنا اور نکلنے کے بعد بدن کا سست ہونا ) کے ہمراہ ہو تو وہ رطوبت منی کے حکم میں ہوگی اور اس صورت میں غسل جنابت واجب ہوگا ؛ اور عورتوں سےجو رطوبت لذت جنسی کے اوج پر پہنچنے کے بعد خارج ہوتی ہے وہ منی کے حکم میں ہوگی اور اس کے علاوہ انسان کے ذمہ کوئی اور چیز نہیں ہے

لباس دھونے والی مشینوں کے احکام

س ۔ کیا لباس دھونے والی مشینوں کے ذریعہ نجس کپڑے پاک ہوجاتے ہیں ؟
ج ۔ اصل نجاست برطرف کرنے کے بعد مشین کے اندرٹوٹی سے متصل پانی اگر کپڑوں اور مشین کے تمام حصوں تک پہنچ جائے اور پھر اس سے خارج اور الگ ہوجائے تو اس صورت میں کپڑے پاک ہوجائیں گے

جدید آلات کے ذریعہ مرغوں کا ذبح کرنا

س ۔ ان مرغوں کے ذبح کرنے کے بارے میں کیا حکم ہے کہ جن پر مشین کی سرعت کی بنا پرہر ایک کے لئےبسم اللہ نہیں کہا جاتاہے ؟
ج ۔ مرغوں کا وہ گروپ جنکو بسم اللہ کہنے کے بعدایک ساتھ ذبحہ کیا جاتا ہے ان کے لئے ایک بسم اللہ کہنا کافی ہے اسی طرح دوسرے گروپوں کے لئے بسم اللہ کی تکرار کرنا چاہیے

وسواس

س ۔ میں 23 سالہ جوان ہوں اور کئی سال سے سخت وسواس میں مبتلا ہوں بالخصوص طہارت ، نجاست، لباس اور گھر وغیرہ کے متعلق ۔۔۔ کئی بار ڈاکٹر کے پاس علاج کرانے کے لئے گیا ہوں لیکن کوئی فائدہ نہیں ہوا ہےاس سلسلے میں میری راہنمائي فرمائیں؟ ج ۔ شرعی نقطہ نظر سے تمام اشیاء پاک ہیں مگر یہ کہ انکی نجاست پر کوئی دلیل موجود ہو اگر کسی چیز کے نجس ہونے کےبارے میں معمولی شک و تردید ہو تو شرعی لحاظ سے وہ چیز نجس نہیں ہوگی
وہ لوگ جو نجاست کے متعلق سخت نفسیاتی احساسات کے شکار ہیں ( ان کو فقہی اصطلاح میں وسواسی کہا جاتا ہے ) اگر یہ لوگ کسی چیز کی نجاست کے بارے میں کبھی یقین بھی پیدا کرلیں تو انھیں عدم نجاست کا حکم کرنا چاہیے لیکن وہ چیزیں جنکی نجاست کو وہ اپنی آنکھوں سے دیکھ لیں اور دوسرے افراد بھی اس کی نجاست کے سرایت کرنے کا یقین کریں تو ایسے موارد میں نجاست کا حکم کرسکتے ہیں مذکورہ افراد میں یہ حکم اس وقت تک رہے گاجب تک ان میں یہ حساسیت بالکل ختم نہيں ہوجاتی

اسماء جلالہ

بسمہ تعالی

س ۔ کیا " بسمہ تعالی " لفظ جلالہ کا حکم رکھتا ہے؟
ج ۔ لفظ جلالہ کا حکم نہیں رکھتا ہے

ہمزہ اور چند نقطوں کے ہمراہ (ا۔۔۔)

س ۔ کیا (ا۔۔۔) لفظ جلالہ کا حکم رکھتا ہے ؟
ج ۔ ہمزہ اور چند نقطے (ا۔۔۔)لفظ جلالہ کے حکم میں نہیں ہیں

جمہوری اسلامی ایران کے آرم کو چھونا

س ۔ کیا جمہوری اسلامی ایران کے پرچم کے نشان کو چھوناجائز ہے ؟
ج ۔ اگر عرف میں پرچم کا نشان اسم جلالہ شمار ہوتا ہو تو اس کو طہارت کے بغیر چھونا جائز نہیں ہے